Հայաստան-Ադրբեջան սահմանազատման աշխատանքները կշարունակվեն․ Բայրամովը խոսել է հաջորդ փուլերի մասին

Հայաստանի և Ադրբեջանի միջև պետական  սահմանազատման աշխատանքները շարունակվում են։ Այս մասին լրագրողների հետ զրույցում հայտարարել է Ադրբեջանի արտգործնախարար Ջեյհուն Բայրամովը, փոխանցում է APA-ն։

Բայրամովի խոսքով՝ սահմանազատման գործընթացի համար ստեղծված հանձնաժողովները կանոնավոր աշխատանք են իրականացնում, և արդեն իսկ կան առաջին արդյունքները։

«Մենք արդեն ականատես ենք եղել այս աշխատանքի առաջին դրական արդյունքներին․ պետական սահմանի շուրջ 13 կիլոմետր հատված սահմանազատվել է»,- նշել է նա։

Ադրբեջանի ԱԳ նախարարը նաև հայտարարել է, որ կողմերի միջև որոշակի համաձայնություններ են ձեռք բերվել, և սահմանազատման գործընթացը կշարունակվի հյուսիսից հարավ։ Նրա խոսքով՝ գործընթացի շրջանակում կքննարկվեն նաև էքսկլավային գյուղերի հարցերը։

Բայրամովը հավելել է նաև, որ ադրբեջանական կողմն արդեն ավարտել է Հայաստանի հետ խաղաղության համաձայնագրի վերջնական կնքման համար անհրաժեշտ բոլոր ընթացակարգերը։