«Ո՞վ է հաշվարկել քնաբերի դոզան, և կշռվե՞լ են կենդանիները մինչ ներարկումը». Դավիթ Թումասյանը՝ առյուծի մահվան մասին

Իրավաբան, դիպլոմավորված անասնաբույժ Դավիթ Թումասյանը անդրադարձել է ԲՀԿ առաջնորդ, գործարար Գագիկ Ծառուկյանին պատկանող առյուծի մահվան դեպքին՝ բարձրացնելով մի շարք իրավական և մասնագիտական հարցեր։

Թումասյանի խոսքով՝ առյուծների ընդհանուր քանակն ամբողջ աշխարհում չի գերազանցում 27-29 հազարը, ուստի մեկ առյուծի անկումը պետք է ուշադրության արժանանա նաև միջազգային մակարդակով։

Նա նշել է, որ իրավական տեսանկյունից մի շարք հարցեր դեռևս պատասխան չեն ստացել կամ հանրայնացված չեն։

Մասնավորապես, Թումասյանը հարց է բարձրացրել,

1 – Ի՞նչ անհրաժեշտություն կար այդ առյուծներին տեղափոխել կենդանաբանական այգի և մինչ այդ նրանց պահման պայմաններում ի՞նչ է փոխվել, որ այդ անհրաժեշտությունն առաջացավ հենց հիմա: Որքանո՞վ էր տեղափոխումն իրավաչափ և հիմնավոր:
2 – Ուղեկցող հիվանդությունների ցանկը տպավորիչ է, սակայն դրանք ա՞յն աստիճանի էին, որ կարող էին հանգեցնել մահվան: Հազարավոր կենդանիներ և մարդիկ տարիներով ապրում են և՛ լյարդի ցիրոզով, և՛ այլ նշված հիվանդություններով:
3 – Հաշվի առնելով կենդանիների տեղափոխումը՝ արդյ՞ոք ներկա է եղել մասնագիտացված անասնաբույժ և իրականացվել է կենդանիների նախնական զննում, որը կենդանիների տեղափոխումից առաջ պարտադիր է:
4 – Ո՞վ է հաշվարկել քնաբերի դոզան, և կշռվե՞լ են կենդանիները մինչ ներարկումը, քանի որ քնաբերի դոզան հաշվարկվում է անհատապես՝ կենդանի քաշի 1 կգ-ի հաշվով:
5 – Կենդանաբանական այգի հասնելուն պես՝ կենդանիները ենթարկվե՞լ են բժշկական զննման, թե՝ ոչ, իսկ եթե ոչ՝ ապա ինչո՞ւ:


Թումասյանը հավելել է, որ այս հարցերը բարձրացնում է ոչ միայն որպես իրավաբան, այլ նաև որպես դիպլոմավորված անասնաբույժ։