Ռուսաստանը հարվածել է Կիևում ռազմաարդյունաբերական օբյեկտներին

Ռուսաստանի պաշտպանության նախարարությունը հայտարարել է, որ գիշերը բարձր ճշգրտության զենքով խմբային հարված է հասցրել Կիևում գտնվող Ուկրաինայի ռազմաարդյունաբերական համալիրի մի շարք օբյեկտների։

ՌԴ պաշտպանության նախարարության հաղորդմամբ՝ գործողությունն իրականացվել է ի պատասխան Ռուսաստանի տարածքում քաղաքացիական ենթակառուցվածքների վրա Կիևի իրականացրած հարձակումների։

Նշվում է, որ հարվածների հետևանքով խոցվել են «ՍԱՄՍՈՒՆԳ-ՈՒԿՐԱԻՆԱ» ընկերության արդյունաբերական ձեռնարկությունը, որտեղ, ըստ ռուսական կողմի, արտադրվում և պահվում էին FP-5 «Ֆլամինգո» ցամաքային տեղակայման թևավոր հրթիռների բաղադրիչներ, ինչպես նաև մեծ և միջին հեռահարության անօդաչու թռչող սարքերի հավաքման արտադրամասը։

Միաժամանակ ուկրաինական լրատվամիջոցները հայտնել են Ռուսաստանի տարածքում մի շարք օբյեկտների վրա հասցված հարվածների մասին։ Նրանց տեղեկություններով՝ թիրախավորվել են «Նիժնեկամսկնեֆտեխիմ» նավթաքիմիական ձեռնարկությունը, Վորոնեժի մարզում գտնվող «Բորիսոգլեբսկ» ռազմական օդանավակայանը, ինչպես նաև Սարատովի նավթավերամշակման գործարանը, որը մտնում է «Ռոսնեֆտ»-ի կառուցվածքի մեջ։