Աբովյան համայնքին կվերադարձվի շուրջ 80 մլն դրամ արժողությամբ տարածքը

Կոտայքի մարզի դատախազության ներկայացրած հայցի հիման վրա Հակակոռուպցիոն դատարանը անվավեր է ճանաչել Աբովյան համայնքում գտնվող զբոսայգու հողամասի աճուրդը։

Դատախազության հաղորդմամբ՝ պետական (համայնքային) շահերի պաշտպանության շրջանակում 2025 թվականի սեպտեմբերի 15-ին հայց էր ներկայացվել Հակակոռուպցիոն դատարան՝ ընդդեմ Աբովյան համայնքի և ֆիզիկական անձի՝ հողամասի աճուրդն անվավեր ճանաչելու և անվավերության հետևանքներ կիրառելու պահանջով։

2026 թվականի հունիսի 29-ի վճռով դատարանը բավարարել է դատախազության հայցը։ Անվավեր է ճանաչվել Հողային օրենսգրքի 60-րդ հոդվածով նախատեսված՝ զբոսայգի հանդիսացող 916,6 քմ մակերեսով հողամասի 2018 թվականի մայիսի 18-ին անցկացված աճուրդը։

Որպես աճուրդի անվավերության հետևանք՝ անվավեր է ճանաչվել նաև նշված հողամասի նկատմամբ ֆիզիկական անձի անվամբ կատարված սեփականության իրավունքի պետական գրանցումը։

«Վճիռն օրինական ուժի մեջ մտնելուց հետո, Կոտայքի մարզի Աբովյան համայնքին կվերադարձվի 916,6 քմ մակերեսով, շուրջ 80 միլիոն դրամ շուկայական արժեքով հողատարածքը»,- նշվում է դատախազության հաղորդագրության մեջ։