Այն, ինչ այսօր արվեց Գագիկ Ծառուկյանի նկատմամբ, այլանդակություն է. Արսեն Ջուլֆալակյան

Ըմբշամարտի աշխարհի և Եվրոպայի չեմպիոն, ԱԺ նախկին պատգամավոր Արսեն Ջուլֆալակյանը անդրադարձել է Գագիկ Ծառուկյանի շուրջ տեղի ունեցող իրադարձություններին՝ քննադատելով իրավապահների գործողությունները։

Ջուլֆալակյանը նշել է, որ 2020 թվականի փետրվարից Գագիկ Ծառուկյանի հետ որևէ հարաբերություն չունի՝ հավելելով, որ հանդիպել է նրան միայն մեկ անգամ՝ Փարիզում, երբ Ծառուկյանը մասնակցում էր ըմբշամարտի մրցումների դիտմանը։

«Այն, ինչ այսօր արվեց Գագիկ Ծառուկյանի նկատմամբ, այլանդակություն է»,- գրել է նա։

Նրա խոսքով՝ տեղի ունեցածը վերաբերում է ոչ միայն կոնկրետ անձին, այլ նաև պետության կողմից քաղաքացու նկատմամբ վերաբերմունքին։

«Սա միայն նրան չի վերաբերում, այլ ցույց է տալիս պետության կողմից տարրական մարդկային վերաբերմունքի բացակայությունն իր քաղաքացու հանդեպ»,- նշել է Ջուլֆալակյանը։

Նա նաև անդրադարձել է իրավապահների գործողություններին՝ դրանք որակելով անընդունելի։

«Տասնյակ ուժայիններով գետնել 70-ամյա մարդուն՝ իր տանը, երբ նա միայնակ է, չի դիմադրում և պատրաստ է հանգիստ ենթարկվել օրինական պահանջներին, ստորության գագաթնակետն է»,- գրել է Արսեն Ջուլֆալակյանը։

Նա նաև նշել է, որ իր գնահատմամբ՝ նման քայլերը չեն կարող թաքցնել իշխանությունների խնդիրները։

«Սա հիվանդ, բարոյազուրկ և թույլ մարդկանց փորձն է՝ ուժի ցուցադրությամբ քողարկելու սեփական ոչնչությունը»,- գրել է նա։

Ջուլֆալակյանը գրառման վերջում հավելել է. «Նման մարդկանց վերջը շատ ավելի ծանր է լինելու»։

Նշենք, որ Ջուլֆալակյանը գրառման սկզբում նաև քննադատել է իշխանություններին՝ նշելով, որ «Արցախը հանձնող անձից/քաղաքական թիմից սպասեք ամեն ինչ» և թվարկել է այն ոլորտները, որոնք, իր խոսքով, իշխանությունը անարգում է։