ՏԵՍԱՆՅՈՒԹ. «Թող Փաշինյանը գա ու տեսնի Armat Media-ի կապարակնքված դռները

Armat Media-ի գլխավոր խմբագիրը հայտարարել է, որ այս պահին Քննչական կոմիտեում են գտնվում լրատվամիջոցի աշխատակիցները, որոնցից 9-ը հոգի նույն քրեական վարույթի շրջանակում հրավիրվել են հարցաքննության՝ որպես վկա։

Նրա խոսքով՝ շուրջ մեկ ամիս առաջ իրավապահները խուզարկություն են իրականացրել Armat Media-ի խմբագրությունում, առգրավել համակարգիչներն ու աշխատակիցների անձնական հեռախոսները, ինչի հետևանքով, ըստ նրա, խաթարվել է խմբագրության աշխատանքը։

«Եթե ասում են, թե մեր աշխատանքը չի խաթարվել, թող Փաշինյանը գա ու տեսնի Armat Media-ի կապարակնքված դռները։ Թող գա և տեսնի, թե ինչ վիճակում է խմբագրությունը»,- ասել է նա։

Խմբագիրը նաև դիմել է Հայաստանում Եվրոպական միության դեսպանին՝ հարց բարձրացնելով, թե արդյոք ԵՄ անդամ որևէ երկրում լրատվամիջոցի գործունեության նկատմամբ նման գործողությունների դեպքում նույն լռությունը կպահպանվեր։

Նա կոչ է արել նաև խոսքի ազատությամբ զբաղվող հասարակական կազմակերպություններին և Մարդու իրավունքների պաշտպան Անահիտ Մանասյանին արձագանքել ստեղծված իրավիճակին՝ պնդելով, որ Armat Media-ի աշխատակիցների իրավունքները խախտվել են։