Թրամփը կմասնակցի Էրդողանի նախաձեռնած ՆԱՏՕ-ի գագաթնաժողովին՝ նրա նկատմամբ հարգանքից ելնելով

ԱՄՆ նախագահ Դոնալդ Թրամփը հայտարարել է, որ կմասնակցի Անկարայում կայանալիք ՆԱՏՕ-ի գագաթնաժողովին՝ հիմնականում Թուրքիայի նախագահ Ռեջեփ Թայիփ Էրդողանի հրավերի և նրա նկատմամբ հարգանքի պատճառով։

Այս մասին նա ասել է Վաշինգտոնում ՆԱՏՕ-ի գլխավոր քարտուղար Մարկ Ռյուտեի հետ հանդիպման ընթացքում, որի տեսանյութը տարածել է Fox News-ը։

«Չեմ կարծում, թե կգնայի, եթե նախագահ Էրդողանը չհյուրընկալեր այն Թուրքիայում», - նշել է Թրամփը՝ հավելելով, որ «մարդկանց մեծամասնության համար» ինքը չէր մասնակցի այդ միջոցառմանը։

ԱՄՆ նախագահը նաև դժգոհություն է հայտնել, որ ՆԱՏՕ-ի դաշնակիցները, իր գնահատմամբ, բավարար աջակցություն չեն ցուցաբերել Վաշինգտոնին Իրանի հետ կապված հակամարտության ընթացքում։

Թրամփի խոսքով՝ Էրդողանի անձնական խնդրանքն է եղել, որ նա մասնակցի գագաթնաժողովին՝ ընդգծելով, որ «ԱՄՆ-ն պետք է այնտեղ լինի»։

Նա նաև բարձր է գնահատել այն փաստը, որ Թուրքիան չի միջամտել Իրանի դեմ ընթացող հակամարտությանը՝ նշելով, որ նույն կերպ չեն միջամտել նաև Չինաստանն ու Ռուսաստանը։