Գլենդելում առաջին անգամ ոստիկանապետ է դարձել հայազգի պաշտոնյա

ԱՄՆ Կալիֆոռնիայի նահանգի Գլենդել քաղաքի պատմության մեջ առաջին անգամ ոստիկանապետի պաշտոնը զբաղեցրել է հայազգի պաշտոնյա։

«Արմենպրես»-ի փոխանցմամբ՝ US Armenia հեռուստաընկերությունը հայտնում է, որ Ռոբերտ Ուիլյամը շուրջ 24 տարի ծառայել է Գլենդելի ոստիկանության համակարգում՝ անցնելով ծառայողական տարբեր աստիճաններ։

Նա նշանակվել է քաղաքի 21-րդ ոստիկանապետը։

Ուիլյամը նշել է, որ իր գլխավոր առաջնահերթությունները լինելու են քաղաքի անվտանգության ապահովումը և տարբեր համայնքների հետ համագործակցության խորացումը։

«Հպարտ եմ, որ դարձել եմ Գլենդելի առաջին հայազգի ոստիկանապետը։ Սակայն իմ նպատակը երբեք առաջինը լինելը չի եղել, այլ՝ քաղաքն անվտանգ պահելը»,-ասել է նա։

Նրա խոսքով՝ հայկական ինքնությունը կարևոր դեր է ունեցել իր կյանքում․ «Տանը միշտ հայերեն ենք խոսել»։

Ռոբերտ Ուիլյամը նաև ընդգծել է, որ իր նշանակումը կարող է օրինակ ծառայել երիտասարդների համար՝ ցույց տալով, որ նման ճանապարհը հնարավոր է բոլորի համար։

Գլենդելի ոստիկանությունը Լոս Անջելեսի շրջանի խոշորագույն իրավապահ կառույցներից է՝ ավելի քան 500 աշխատակիցներով։