ԱՄՆ-ը պատրաստ է անհրաժեշտ օգնություն ցուցաբերել երկրաշարժից տուժած Վենեսուելային

Վենեսուելայում գրանցված երկու հզոր երկրաշարժերի կապակցությամբ ԱՄՆ նախագահ Դոնալդ Թրամփը հայտնել է Վաշինգտոնի պատրաստակամությունը՝ տրամադրելու ցանկացած տեսակի անհրաժեշտ աջակցություն։

Սպիտակ տան ղեկավարը շեշտել է, որ համապատասխան հանձնարարականներն արդեն տրված են բոլոր կառավարական գերատեսչություններին՝ անհապաղ արձագանքում ապահովելու նպատակով: Դոնալդ Թրամփը հավաստիացրել է, որ Միացյալ Նահանգները կաջակցի Վենեսուելայի ժողովրդին, և հավելել, որ ստացվող նախնական տեղեկությունները խորը մտահոգության տեղիք են տալիս:

Դրանից առաջ Վենեսուելայի տարածքում 39 վայրկյան ընդմիջումով արձանագրվել էին 7,2 և 7,5 մագնիտուդ ուժգնությամբ երկու ցնցումներ: Երկրի ներքին գործերի նախարար Դիոսդադո Կաբելոյի տեղեկացմամբ՝ պետության ողջ տարածքում արձանագրվել են շենքերի, տների ու բնակելի այլ շինությունների փլուզումներ: Վենեսուելայի նախագահի պաշտոնակատար Դելսի Ռոդրիգեսն իր հերթին հայտնել է, որ ըստ նախնական տվյալների՝ աղետի հետևանքով կա 32 զոհ և ավելի քան 700 վիրավոր: Նա միևնույն ժամանակ նշել է, որ տուժածների քանակը հնարավոր է ավելանա։ Ստեղծված իրավիճակով պայմանավորված՝ երկրում սահմանվել է արտակարգ դրություն: