Նպատակ կա Աշխատանքի և սոցիալական հարցերի նախարարությունը վերանվանել Աշխատանքի և բարեկեցության նախարարություն

Աշխատանքի և սոցիալական հարցերի նախարար Արսեն Թորոսյանն այսօր նախարարության և Միասնական սոցիալական ծառայության աշխատակազմերի ներկայացուցիչների մասնակցությամբ անցկացրել է գործակարգավարական խորհրդակցություն։

Հանդիպման ժամանակ Թորոսյանն անդրադարձել է ԱՍՀ նախարարության անվանափոխության վերաբերյալ նախաձեռնությանը։ Գերատեսչության ղեկավարը հայտնել է, որ նպատակ կա առաջիկայում Աշխատանքի և սոցիալական հարցերի նախարարությունը վերանվանել Աշխատանքի և բարեկեցության նախարարություն, իսկ Միասնական սոցիալական ծառայության գործառութային համակարգում հետագայում նույնպես նախատեսվում են փոփոխություններ։

 Հիշեցնենք, որ գործադիրի նախորդ նիստին այս թեմայի մասին խոսել էր Նիկոլ Փաշինյանը։ «Նոր կառավարությունում, գուցեթե, մտածենք նախարարության անունը փոխելու մասին։ Դա դեռ կքննարկենք, սա ընդամենը գաղափար է, գուցե՝ այո՛, գուցե՝ ո՛չ»,- նշել էր Փաշինյանը։