Ռուսաստանի Պրիմորիեի երկրամասում ուղղաթիռ է անհետացել, որում երկու մարդ է եղել

Ռուսաստանի Պրիմորիեի երկրամասում Robinson ուղղաթիռը, որը կիրակի օրը թռիչք էր կատարել Տեռնեյից դեպի Եդինկա գյուղ, նախատեսված ժամին չի կապնվել, հայտնում է «Коммерсантъ»-ը։

Օդանավում եղել են օդաչուն ու դիտորդ-օդաչուն, որոնց գտնվելու վայրն այս պահին դեռ հստակեցված չէ։ Արևելյան միջտարածաշրջանային տրանսպորտի քննչական վարչության տեղեկություններով՝ պատահարի տարածքում մեկնարկել են որոնողափրկարարական գործողություններ։ Քննիչների կողմից հարուցվել է քրեական գործ օդանավի շարժման և շահագործման անվտանգության կանոնները խախտելու հոդվածով, ինչն առաջացրել է երկու կամ ավելի անձանց մահ։

Հեռավորարևելյան տրանսպորտային դատախազությունը մանրամասնել է, որ խոսքը R-44 ուղղաթիռի մասին է, որն իրականացնում էր անտառային ավիացիոն աշխատանքներ։ Անձնակազմը պետք է կապ հաստատեր տեղական ժամանակով կեսօրին։ Վերահսկող մարմինը սկսել է թռիչքների անվտանգության պահանջների կատարման ստուգում։ Եդինկա գյուղը հանդիսանում է Պրիմորիեի ամենահեռավոր բնակավայրը, որի հետ առկա է կանոնավոր օդային կապ։