Ֆրանսիայում ուժեղ շոգի պատճառով կփոխվի դպրոցների աշխատանքը

Ֆրանսիայում սաստիկ շոգ եղանակի հետևանքով երկուշաբթի օրը դռները կփակեն 845 դպրոցներ ու քոլեջներ, իսկ շուրջ 1800 կրթական հաստատություններ կանցնեն աշխատանքային այլ գրաֆիկի՝ արձակելով աշակերտներին օրվա առաջին կեսին, հայտնում է Le Figaro-ն։

Կրթության նախարար Էդուար Ժեֆրեն տեղեկացրել է, որ դասարանների փակումը հիմնականում կիրականացվի այն տարածքներում, որտեղ հայտարարված է եղանակային վտանգի կարմիր մակարդակ: Նախարարը հստակեցրել է, որ երկրում գործող շուրջ 60 հազար ուսումնական հաստատություններից 845 դպրոցներում և քոլեջներում դասապրոցեսը կա՛մ լիովին չեղարկվել է, կա՛մ կանցկացվի նվազագույն ձևաչափով: 

Ըստ նրա՝ նման որոշումները կայացվում են տարածաշրջանային մակարդակով, քանի որ երկրի տարբեր մասերում իրավիճակները տարբերվում են։ Ժեֆրեն նաև հավելել է, որ թեև գլխավոր սկզբունքը կրթության անընդհատության ապահովումն է, սակայն սովորողների և անձնակազմի անվտանգությանը սպառնացող վտանգի դեպքում թույլատրելի են բացառություններ ու ժամանակավոր փակումներ։ 

Զուգահեռաբար, Իլ-դը-Ֆրանս տարածաշրջանի կողմից հայտարարվել է մեկ միլիոն եվրոյի արտակարգ աջակցություն 500 քննական կենտրոնների համար, որն ուղղվելու է օդափոխիչների, օդի սառեցման համակարգերի և շոգից պաշտպանող այլ սարքավորումների ձեռքբերմանը։