ԵՄ երկրները համաձայնել են բանակցություններ սկսել Ուկրաինայի և Մոլդովայի հետ

Եվրախորհրդարանի նախագահ Ռոբերտա Մեցոլան հայտարարել է, որ Եվրամիության երկրները համաձայնություն են տվել Ուկրաինայի և Մոլդովայի հետ անդամակցության շուրջ բանակցություններ սկսելուն: Նրա պնդմամբ՝ ընդլայնումը հանդիսանում է ԵՄ-ի ամենահզոր աշխարհաքաղաքական գործիքը, և Ուկրաինան ու Մոլդովան պատկանում են Եվրոպային:

Ուկրաինայի անդամակցության շուրջ բանակցությունների մեկնարկը հնարավոր է դարձել այն բանից հետո, երբ Հունգարիան հանել է իր վետոն: Առաջին միջկառավարական համաժողովը նախատեսված է հունիսի 15-ին:

Եվրոպական խորհրդի նախագահ Անտոնիու Կոշտան և Եվրահանձնաժողովի նախագահ Ուրսուլա ֆոն դեր Լայենը համատեղ հայտարարության մեջ նշել են՝ Ուկրաինայի և Մոլդովայի հետ անդամակցության բանակցությունների մեկնարկը ցույց է տալիս, որ այդ երկու երկրները նույնիսկ դժվարին պայմաններում ցուցաբերել են վճռականություն և աշխատել բարեփոխումների ուղղությամբ:

Ուկրաինայի և Մոլդովայի նախագահներ Վոլոդիմիր Զելենսկին և Մայա Սանդուն ողջունել են բանակցությունների մեկնարկի վերաբերյալ Եվրամիության երկրների կայացրած որոշումը: