Կալասը դեմ է ԵՄ միասնական բանակի ստեղծմանը

Եվրամիության արտաքին քաղաքականության և անվտանգության հարցերով բարձր ներկայացուցիչ Կայա Կալասը հանդես է եկել Եվրամիության միասնական բանակ ստեղծելու գաղափարի դեմ՝ զգուշացնելով, որ զուգահեռ կառույցները կարող են խառնաշփոթ առաջացնել պաշտպանության ոլորտում։ Այս մասին նա հայտարարել է Կիպրոսում ԵՄ պաշտպանության նախարարների ոչ պաշտոնական հանդիպման արդյունքներով կայացած մամուլի ասուլիսի ընթացքում։

«Ինչո՞ւ չեմ աջակցում լրացուցիչ բանակի ստեղծմանը։ Որովհետև միավորման յուրաքանչյուր անդամ պետություն ունի իր բանակը։ Դրանցից 23-ը նաև ՆԱՏՕ-ի անդամ են։ Եթե այդ բանակը տրամադրված է ՆԱՏՕ-ի ենթակայությանը, ապա այն չի կարող օգտագործվել այլ վայրում։ Հնարավոր չէ ստեղծել ևս մեկ՝ պարզապես զուգահեռ բանակ»,- ասել է Կալասը։

Նա ընդգծել է, որ շատ կարևոր է «չստեղծել այնպիսի կառույցներ, որոնք կարող են խառնաշփոթ առաջացնել»։ Եվրադիվանագիտության ղեկավարի խոսքով՝ ԵՄ անդամ պետությունները պետք է հստակ պատկերացնեն, թե ճգնաժամային իրավիճակում ով ինչ դեր և պատասխանատվություն ունի։