Պուտին․ ԵԱՏՄ-ում սննդի ստանդարտներն ավելի խիստ են, քան ԵՄ-ում

ՌԴ նախագահ Վլադիմիր Պուտինը հայտարարել է, որ ԵԱՏՄ-ում գործող ֆիտոսանիտարական նորմերը ավելի խիստ են, քան Եվրամիությունում։

Նրա խոսքով՝ դա վերաբերում է նաև գենետիկորեն ձևափոխված օրգանիզմների (ԳՁՕ) նկատմամբ սահմանափակումներին։ Այս մասին ՌԴ նախագահը հայտարարել է Ղազախստան կատարած այցի արդյունքներով անցկացված մամուլի ասուլիսում։

«Մեզ մոտ, օրինակ, սահմանափակումներ կան գենետիկորեն ձևափոխված արտադրանքի նկատմամբ»,- ասել է Պուտինը։

Նա նշել է, որ Ռուսաստանում դեռ խորհրդային ժամանակներից պահպանվել է արտադրանքի որակի վերահսկողության խիստ մոտեցումը, իսկ երկրի բնակիչները չեն ցանկանում օգտագործել գենետիկորեն ձևափոխված մթերքներ։

Պուտինի խոսքով՝ քանի դեռ բավարար հետազոտություններ չկան ԳՁՕ-ների ազդեցության վերաբերյալ, ԵԱՏՄ երկրները կշարունակեն պահպանել ավելի խիստ տեխնիկական նորմերը։