Ի՞նչ կկորցնի Հայաստանը ԵԱՏՄ-ից դուրս գալու դեպքում. ԶԼՄ

ՌԻԱ Նովոստի-ի փոխանցմամբ՝ Եվրասիական տնտեսական միությունից դուրս գալու պարագայում Հայաստանը ռիսկի տակ է դնում իր ապրանքաշրջանառության մոտավորապես 40 տոկոսը։

Հիմնվելով ազգային վիճակագրական ծառայությունների տվյալների վրա՝ ռուսական լրատվամիջոցները հայտնում են, որ միությունից դուրս գալու դեպքում Երևանը հնարավոր է զրկվի այն առևտրային արտոնություններից, որոնք ստանում էր ԵԱՏՄ-ին անդամակցելու շնորհիվ, մասնավորապես՝ անդամ պետությունների համար սահմանված 5 տոկոսանոց միասնական ցածր սակագնային դրույքաչափից, ինչպես նաև առանձին դեպքերում ապրանքների անմաքս ներկրման հնարավորությունից։

Այսպես, 2025 թվականի տվյալներով՝ Հայաստանը միության անդամ երկրներ արտահանում իրականացնելու արդյունքում ստացել է 3,2 միլիարդ դոլար։ Առևտրից ձևավորված եկամտի հիմնական մասը ապահովվել է դեպի ռուսական շուկա կատարված մատակարարումներից՝ կազմելով 2,9 միլիարդ դոլար։

Միևնույն ժամանակ, հայաստանյան գնորդները ԵԱՏՄ անդամ պետություններից ձեռք են բերել 5 միլիարդ դոլարի ապրանք։ Այս արտադրանքը գլխավորապես ներմուծվել է Ռուսաստանից, ինչի ցուցանիշը կազմել է 4,87 միլիարդ դոլար։

Այսպիսով, 2025 թվականին Երևանի ապրանքաշրջանառությունը ԵԱՏՄ-ի հետ կազմել է 8,2 միլիարդ դոլար, մինչդեռ աշխարհի մյուս երկրների հետ այն կազմել է 13,2 միլիարդ դոլար։ Սա փաստում է, որ միության հետ իրականացվող առևտրին բաժին է հասնում Հայաստանի ամբողջ ապրանքաշրջանառության 38,5 տոկոսը։