Իոաննիսյանը պահանջում է բացահայտել՝ ով է ֆինանսավորել քաղաքական PR-ն ու արշավները

Իրավապաշտպան Դանիել Իոաննիսյանը գրել է.

«Եվս երկու կարևոր հետաքննություն է հրապարակվել

Կարծում եմ, Hayk Marutyan-ը պետք է բացատրի, թե ով է վճարել ռուսական հետազոտական կազմակերպությանը՝ իր կուսակցության PR-ի նախապատրաստման համար։ Արդյո՞ք դա նույն Արթուր Սողոմոնյանն է վճարել, ով Եզրաս արքեպիսկոպոսի ընկերն է ու վերջինիս հետ միասին մասնակցել է Լազարյան ակումբի վերջին հանդիպմանը (որտեղ մի խումբ հայաստանցիներ Օվերչուկի հետ քննարկում էին Հայաստանի դեմ սանկցիաների կիրառումը)։

Կարծում եմ, որ Arman Tatoyan-ն ու Davit Ananyan-ը պետք է բացատրեն, թե ի վերջո ո՞վ է ֆինանսավորել իրենց՝ նախորդ տարվանից սկսված արշավը (հարյուր միլիոնավոր դրամների ծախսեր արդեն հաշվել ենք), ի՞նչ կապ ունեն Կիրիենկոյի ենթակայությամբ գործող ЭИСИ կենտրոնի հետ ու ո՞նց է հեղինակավոր «Դոսյե»–ի ձեռքում հայտնվել, իրենց բնորոշմամբ, Դավիթ Անանյանի ու ЭИСИ-ի փոխտնօրենի համատեղ գրված 926 միլիոն դրամի ռուսերեն նախահաշիվը։

Սրանք քարոզարշավի ու քաղաքական ֆինանսավորման օրինականության վերաբերյալ հարցեր են, որոնք առաջացել են այսօրվա հրապարակումների ֆոնին։

Հ․Գ․ Իսկ Իրավապահները, եթե նորմալ գործեին, արդեն պետք է խուզարկությամբ առգրաված լինեին Դավիթ Անանյանի համակարգիչը, որ պարզեին, թե արդյո՞ք նա միլիոնավոր դոլարների բյուջեներ է գրում Կիրիենկոյի ենթակաների հետ միասին, թե ոչ»,– նշել է նա: