Թբիլիսիից շոկային ուղերձ Երևանին․ ինչ զարգացումներ են սպասվում

Վրաստանի վարչապետ Իրակլի Կոբախիձեն հայտարարել է, որ արտաքին ուժերի և տեղական որոշ շրջանակների փորձերը՝ խաթարելու հարաբերությունները Հայաստանի հետ, ձախողվել են։ Այս մասին կառավարության ղեկավարը խոսել է վրացական «Իմեդի» հեռուստաընկերությանը տված հարցազրույցում։

Ըստ վարչապետի՝ որոշակի արտաքին հովանավորներ և տեղական դերակատարներ նպատակաուղղված փորձում են հակադրել երկու հարևան պետություններին։ Դրա համար, ըստ Կոբախիձեի, հաճախ կիրառվում են տարբեր արհեստական համեմատություններ, սակայն այդ բոլոր քայլերը որևէ արդյունքի չեն հանգեցրել։

Անդրադառնալով եվրոպացի պաշտոնյաներից մեկի այն հայտարարությանը, թե Հայաստանը Կենտրոնական Ասիան Եվրոպային կապող «ամենակարճ ուղին է», Վրաստանի կառավարության ղեկավարը թերահավատություն է հայտնել։ Նա հավելել է, որ նման գնահատականներ հնչեցնող եվրոպացի բյուրոկրատները, ըստ ամենայնի, լավ չեն տիրապետում աշխարհագրությանը։