Բաքվից կոշտ ազդակ․ Ադրբեջանը թող չուրախանա Փաշինյանի խոսքերից․ դիվանագետ

Ադրբեջանի նախկին արտգործնախարար Թոֆիգ Զուլֆուգարովը հորդորել է հավատ չընծայել Հայաստանի կառավարության ղեկավարի արած հայտարարություններին։

Դիվանագետի պնդմամբ՝ պաշտոնական Երևանի որդեգրած խաղաղասիրական հռետորաբանությունը, ինչպես նաև Մոսկվայից տարանջատվելու քաղաքական գիծը սոսկ տակտիկական քայլեր են։ 

Զուլֆուգարովը կարծում է, որ ադրբեջանական լրատվական դաշտը ժամանակից շուտ է ՀՀ վարչապետ Նիկոլ Փաշինյանի խոսքերը որակում որպես վերջնական շրջադարձ դեպի խաղաղության գործընթաց, քանի որ առ այսօր որևէ արմատական գործնական քայլ կյանքի չի կոչվել։

Նախկին պաշտոնյայի դիտարկմամբ՝ Հայաստանի ղեկավարության իրական նպատակները հարկավոր է գնահատել Սահմանադրությունը փոփոխելու և տարածքային հավակնություններից հրաժարվելու պատրաստակամության լույսի ներքո։ 

Նա շեշտել է, որ առանց համաժողովրդական հանրաքվեի կազմակերպման ու Մայր օրենքի վերանայման՝ խաղաղության պայմանագրի կնքումը շարունակաբար հետաձգվելու է։ Ադրբեջանցի դիվանագետը նաև մատնանշել է, որ Երևանը ձգտում է տարածքային ամբողջականության երկկողմ ճանաչումը հրամցնել որպես սահմանների վերջնական ամրագրում, այնինչ դեմարկացիայի և դելիմիտացիայի աշխատանքները դեռևս չեն հասել իրենց ավարտին։ 

Ադրբեջանի նախկին արտգործնախարարը կասկածանքով է արտահայտվել նաև հայ-ռուսական կապերի սառեցման վերաբերյալ՝ ուշադրություն հրավիրելով երկու պետությունների միջև առկա ապրանքաշրջանառության աճի և Հայաստանում ռուսական ռազմական ենթակառուցվածքների պահպանման փաստի վրա։ Դրանից բացի, ըստ նրա, հայկական կողմը Լեռնային Ղարաբաղի խնդիրը տարածքային հարթությունից տեղափոխում է մարդու իրավունքների տիրույթ, ինչը հետագա փուլերում հնարավոր է կիրառվի միջազգային երաշխիքների ներքո հայ բնակչության վերադարձի հարցը կրկին օրակարգ բերելու նպատակով։