Օվերչուկը զգուշացնում է Հայաստանին՝ Մոսկվան չի աջակցի ոչ բարեկամական ուժերին մոտեցող երկրին

Ռուսաստանի Դաշնության փոխվարչապետ Ալեքսեյ Օվերչուկը «ՏԱՍՍ» լրատվական գործակալությանը տված հարցազրույցում խոսել է Եվրասիական տնտեսական միության (ԵԱՏՄ) և Եվրոպական միության (ԵՄ) միջև Հայաստանի ընտրության մասին:

Ռուսաստանի կառավարության ներկայացուցիչը նշել է, որ այս խնդիրը բավականին բարդ է, քանի որ տնտեսական ու քաղաքական գործոնները սերտորեն միահյուսված են, ինչը դրսևորվում է նաև երկրում ընթացող նախընտրական քարոզարշավի համատեքստում։

 Օվերչուկի ձևակերպմամբ՝ Մոսկվան շահագրգռված է ԵԱՏՄ-ին Հայաստանի անդամակցության պահպանմամբ, որպեսզի երկիրը բաց չթողնի ներկայիս տնտեսական առավելությունները։ Նա շեշտել է, որ միությանն անդամակցելու 11 տարիների ընթացքում Հայաստանում արձանագրվել է ՀՆԱ-ի և կենսամակարդակի աճ։ Միևնույն ժամանակ, ՌԴ փոխվարչապետը մատնանշել է Երևանի ձգտումները դեպի ԵՄ՝ հիշատակելով նախորդ տարվա ապրիլին ընդունված օրենքը, և կոչ է արել հայկական կողմին արագ կողմնորոշվել, քանի որ առկա անորոշությունը խոչընդոտում է երկարաժամկետ տնտեսական հարաբերությունների կայացմանը։

Ռուսաստանի փոխվարչապետը նաև հայտարարել է, որ Մոսկվան ցանկանում է տեսնել Հայաստանը ԵԱՏՄ կազմում, սակայն Երևանը պետք է հստակեցնի իր դիրքորոշումը։ Նա հավելել է, որ ԵՄ-ի ռազմականացման պայմաններում Երևանը պետք է գնահատի իր քայլերի հետևանքները, քանի որ Ռուսաստանի համար անընդունելի է սեփական բյուջեի հաշվին աջակցել մի երկրի, որը մերձենում է իրեն ոչ բարեկամական կառույցների հետ։ Անդրադառնալով տարածաշրջանային խաղաղությանը՝ Օվերչուկը նշել է, որ Մոսկվայի ջանքերով Հայաստանի և Ադրբեջանի միջև հարաբերությունների կարգավորման ու տրանսպորտային մասնակի ապաշրջափակման գործընթաց է սկսվել: Հայաստանի կարգավիճակի հարցը քննարկվելու է մայիսի 29-ին Աստանայում կայանալիք Բարձրագույն եվրասիական տնտեսական խորհրդի նիստում։