Նրանք դիտավորյալ սպառնալիքներ են ստեղծում․ Իրանի ԱԳՆ-ն՝ կոշտ հայտարարությամբ

Իրանի արտաքին գործերի նախարարության պաշտոնական ներկայացուցիչ Էսմաիլ Բաղային, անդրադառնալով տարածաշրջանային իրավիճակին, նշել է, որ Միացյալ Նահանգների և Իսրայելի ռազմական քայլերի պատճառով ձախողվել են երկկողմ դիվանագիտական գործընթացները։ Իրանցի դիվանագետի պնդմամբ՝ Վաշինգտոնն ու Թել Ավիվը դիտավորյալ սպառնալիքներ են ստեղծում էներգետիկ հանգուցային ուղիների անվտանգության համար։

Բաղային ընդգծել է, որ Միացյալ Նահանգները սեփական քայլերի պատասխանատվությունից խուսափելու համար փորձում է մեղադրել Իրանին։ Նա այս գործելաոճը համեմատել է Նացիստական Գերմանիայի քարոզչության նախարար Յոզեֆ Գեբելսի այն մոտեցման հետ, երբ սեփական արարքների մեջ մեղադրում են դիմացինին։

Իրանի ԱԳՆ խոսնակը Վաշինգտոնի վարած քաղաքականությունը նմանեցրել է նաև Հին Հռոմի կայսրության նվաճողական քաղաքականությանը։ Հղում կատարելով պատմաբան Տացիտի աշխատություններին և հռոմեացի զորավար Ագրիկոլայի՝ Բրիտանական կղզիներում իրականացրած արշավանքներին՝ նա հավելել է, որ ԱՄՆ-ն սկզբում հրահրում է պատերազմներ ու ճգնաժամեր, իսկ այնուհետև շարունակում է էսկալացիան՝ «խաղաղության վերականգնման» պատրվակն օգտագործելով։