ԱՄՆ-ն Իրանին հինգ պայման է առաջադրել․ Fars

Ամերիկայի Միացյալ Նահանգների վարչակազմը պատասխան պահանջներ է ներկայացրել Իրանին, որոնք անհրաժեշտ են համարվում երկկողմ հակամարտության կարգավորման գործընթացը շարունակելու նպատակով։

Ամերիկյան կողմը հրաժարվում է որևէ փոխհատուցում հատկացնել Իրանի տարածքի ռմբակոծությունների պատճառած վնասների համար, այս մասին հայտնում է իրանական «Fars» լրատվական գործակալությունը։ Բացի այդ, Վաշինգտոնի կողմից պահանջ է դրվել Իսլամական Հանրապետության տարածքից դուրս բերել ու ԱՄՆ-ին փոխանցել 400 կիլոգրամ հարստացված ուրան։ Ըստ հաղորդող աղբյուրի՝ ամերիկյան կողմի պայմանները նախատեսում են, որ Իրանում պետք է գործի ընդամենը մեկ միջուկային օբյեկտ։

Միացյալ Նահանգները մտադրություն չունի ապասառեցնել իրանական արգելափակված ֆինանսական միջոցների 25 տոկոսից ավելին։ 

Իսկ Իրանում, այդ թվում նաև Լիբանանում, ռազմական գործողությունների ամբողջական դադարեցման վերաբերյալ Վաշինգտոնն այն կարծիքին է, որ այդ խնդիրը պետք է կարգավորվի բացառապես բանակցային գործընթացի միջոցով։