Կշարունակենք պատրաստվել պատերազմի․ Լուկաշենկո

Բելառուսի զինված ուժերում կշարունակվեն կետային զորահավաքային գործողությունները՝ ուղղված առանձին զորամասերի մարտական պատրաստվածության ստուգմանն ու բարելավմանը։ Այս մասին հայտարարել է երկրի նախագահ Ալեքսանդր Լուկաշենկոն՝ պաշտպանության նախարար Վիկտոր Խրենինի հետ հանդիպման ժամանակ, որտեղ ամփոփվել են բանակի լայնամասշտաբ ստուգումների արդյունքները։

Պետության ղեկավարի խոսքով՝ թեև Բելառուսը հավատարիմ է խաղաղասիրական քաղաքականությանը, սակայն զինված ուժերը պետք է մշտապես պատրաստ լինեն հնարավոր ռազմական գործողությունների։ Լուկաշենկոն ընդգծել է, Բելառուսի զինվորականները կշարունակեն «պատրաստվել պատերազմի»․ դա  կրելու է շարունակական բնույթ, և կետային զորահավաքները լինելու են այդ գործընթացի հիմնական գործիքներից մեկը։

Հանդիպման ընթացքում նախագահը հույս է հայտնել, որ զինվորական ղեկավարությունը պատշաճ հետևություններ կանի նախորդ ստուգումների արդյունքում արձանագրված թերությունների վերաբերյալ։ Նա պաշտպանության նախարարի ուշադրությունը հրավիրել է բացթողումների վերացման անհրաժեշտության վրա՝ նշելով, որ բանակի արդիականացման և կատարելագործման գործընթացը չպետք է սահմանափակվի միայն անցկացված միջոցառումներով։