ԱՄԷ-ի ծրագրած գաղտնի հարվածն Իրանի դեմ բացահայտվել է

Արաբական Միացյալ Էմիրությունները ռազմական գործողություններ են իրականացրել Իրանի դեմ այն ժամանակահատվածում, երբ կողմերի միջև փորձ էր արվում հրադադար հաստատել։ Ըստ The Wall Street Journal պարբերականի հրապարակած տվյալների՝ Աբու Դաբիի թիրախում է հայտնվել Պարսից ծոցում գտնվող Լավան կղզու նավթավերամշակման գործարանը։ Թեև Էմիրությունները պաշտոնապես չի հաստատել այս տեղեկությունը, ամերիկյան աղբյուրները նշում են, որ հարձակումը տեղի է ունեցել ապրիլի սկզբին։

Հրապարակման մեջ նշվում է, որ Միացյալ Նահանգները գաղտնի կերպով ողջունել է ԱՄԷ-ի ներգրավվածությունը հակամարտությանը։ Շեշտվում է նաև, որ Էմիրությունների զինված ուժերը տեխնիկապես բարձր հագեցվածություն ունեն՝ զինված լինելով արևմտյան արտադրության ժամանակակից կործանիչներով և հետախուզական համակարգերով։

Հավելենք՝ իրադարձությունները զարգացել են ապրիլի 8-ին նախագահ Դոնալդ Թրամփի հայտարարած երկշաբաթյա դադարից հետո։ Թեև Իսլամաբադում կայացած բանակցություններն արդյունք չեն տվել, և ապրիլի 13-ից ԱՄՆ-ն սկսել է Հորմուզի նեղուցի շրջափակումը, Էմիրությունների գործողությունները լրացուցիչ լարվածություն են հաղորդել տարածաշրջանային իրավիճակին։ Սպիտակ տան ղեկավարը հետագայում մերժել է Թեհրանի առաջարկները՝ դրանք որակելով անընդունելի։