«Փաշինյանը չի կարողանում ճիշտ մարդկանց նշանակել պատասխանատու պաշտոններում»․ Գագիկ Ծառուկյան

Նիկոլ Փաշինյանը չի կարողանում ճիշտ մարդկանց նշանակել պատասխանատու պաշտոններում, ինչի արդյունքում էլ ձախողում է պետության կառավարումը․ այսօր Կոտայքի մարզի Հրազդան մարզկենտրոնում նախընտրական քարոզարշավի ժամանակ հայտարարեց ԲՀԿ առաջնորդ Գագիկ Ծառուկյանը:  Նա նաև հավելեց , որ բացառում է Փաշինյանի հետ հետընտրական համագործակցությունը

«Բացառում եմ, որովհետև հրապարակում, երբ բոլորս սպասում էինք արդարության սկզբունքին, ես եմ կանգնել իր կողքին ժողովրդի հետ, հիշո՞ւմ եք: Գնացել եմ Հրապարակ, ասել եմ՝ ժողովուրդ ջան, էսօր մեզ պետք է փոփոխություն, ո՞ւմ եք ձեր ձայնը տալու՝ Սասուն Միքայելյանին, Արարատ Միրզոյանին, թե՞ Նիկոլ Փաշինյանին, որովհետև դեմքերը այդ երեքն էին, բոլորը գոռացել են՝ Նիկոլ Փաշինյան: Ասել եմ՝ մինչև վերջ կանգնում ենք, Նիկոլ Փաշինյանին ընտրում ենք վարչապետ: Ասում էր՝ ժողովուրդը տուգանելու մատերիալ չի, «Ղարաբաղը Հայաստան է ու վերջ», և այլն: Մենք եղանք իրենց հետ գործընկեր, իր ասածները չկատարեցինք, որովհետև անընդունելի էր, անմիջապես դրեց Հրապարակում մեր նախարարներին հանեց, հանե՞ց, էսօր մենք պատասխանատու չենք չէ՞ եղածի համար», - ասաց Ծառուկյանը:

Թե Փաշինյանի որ հայտարարություններն են եղել անընդունելի, Գագիկ Ծառուկյանը չմանրամասնեց: