Կալիֆոռնիայում արգելել են հայազգի գործչին ելույթ ունենալ Ցեղասպանության մասին

ԱՄՆ-ի Ֆաուլեր քաղաքի քաղաքապետը թույլ չի տվել հայազգի ավագանու անդամին ելույթ ունենալ Հայոց ցեղասպանության զոհերի հիշատակի միջոցառմանը: Այս մասին հայտնում է The San Joaquin Valley Sun-ը։

Միջադեպը տեղի է ունեցել ապրիլի 26-ին Donny Wright Park-ում անցկացված Հայոց ցեղասպանության հիշատակի միջոցառումից հետո։ Քաղաքային խորհրդի անդամ Գառնիկ Ղազարյանը՝ Ցեղասպանությունը վերապրած հայի թոռը, հայտարարել է, որ իրեն չեն առաջարկել ելույթ ունենալ արարողությանը, իսկ ավելի ուշ մերժել են անգամ կարճ խոսք ասելու հնարավորությունը:

Նրա խոսքով՝ հարցը ոչ թե «անձնական ճանաչման», այլ միջոցառման մեջ այնպիսի մարդու ներգրավվելու մասին էր, որի ընտանիքն անմիջականորեն առնչվել էր Ցեղասպանությանը, ինչն էլ խոչընդոտ էր հանդիսացել։

Ֆաուլերի քաղաքապետ Խուան Մեխիան պատասխանել է, որ արարողությունը «մասնավոր միջոցառում» էր, ոչ թե պաշտոնական նախաձեռնություն։

Ֆաուլերը համարվում է ԱՄՆ-ում հայկական ներգաղթի պատմական կենտրոններից․ Հայոց ցեղասպանությունից հետո քաղաքի բնակիչների զգալի մասը հայկական ծագում ուներ։ Այժմ կազմակերպիչները միջոցներ են հավաքում Ցեղասպանության զոհերի հիշատակին նվիրված մշտական հուշակոթող կառուցելու համար։