Նույնականացման քարտը 16 տարեկանից կդառնա պարտադիր. ԱԺ որոշումը

Հայաստանի խորհրդարանն առաջին ընթերցմամբ հավանություն է տվել «Անձը հաստատող փաստաթղթի մասին» և կից օրենքների նախագծերի փաթեթին, որով ներդրվում է կենսաչափական նոր համակարգ։

Ազգային ժողովի մայիսի 11-ի արտահերթ նիստում քննարկվել և ընդունվել է օրենսդրական փաթեթը, որի նպատակը կենսաչափական նոր համակարգի ներդրման համար իրավական ընթացակարգեր ապահովելն է։ Ներքին գործերի նախարար Արփինե Սարգսյանը հայտնել է, որ գործընթացն իրականացվում է պետություն-մասնավոր գործընկերության շրջանակում։ Ըստ նախարարի՝ այս փոփոխությունները նպաստելու են նաև Եվրոպական միության հետ վիզաների ազատականացման գործընթացին։

Օրենսդրական նախաձեռնությամբ սահմանվում է, որ 16 տարին լրացած քաղաքացիների համար նույնականացման քարտ ունենալը կդառնա պարտադիր։ 6-ից 16 տարեկանների դեպքում քարտի տրամադրումը կլինի կամավոր սկզբունքով, իսկ մինչև 6 տարեկան երեխաների համար անձը հաստատող փաստաթուղթ կհամարվի ծննդյան վկայականը։ Նշենք, որ ներկայում նույնականացման քարտ տրվում է միայն 16 տարին լրացած անձանց։

Նախարարը նաև շեշտել է, որ բոլոր ճամփորդական փաստաթղթերը համապատասխանեցվելու են Քաղաքացիական ավիացիայի միջազգային կազմակերպության ստանդարտներին։ Բացի այդ, օտարերկրացիներին տրվող բոլոր փաստաթղթերը պարտադիր պետք է պարունակեն կենսաչափական տվյալներ։