Հատուկ նպատակով ռուսաստանաբնակ բազմաթիվ հայեր գալիս են Հայաստան․ Փաշինյան

Ռուսաստանաբնակ բազմաթիվ հայեր գալիս են Հայաստան հատուկ այն նպատակով, որպեսզի ընտրություններին քվեարկեն «Քաղաքացիական պայմանագիր» կուսակցության օգտին, Էրեբունի վարչական շրջանում նախընտրական քարոզարշավի շրջանակում հայտարարել է ՀՀ վարչապետ Նիկոլ Փաշինյանը։

Նա պատասխանել է այն դիտարկմանը, թե հայտնի որոշ ուժեր Ռուսաստանից մեծ թվով քաղաքացիների են բերելու Հայաստան՝ ընտրություններին մասնակցելու համար։ 

«Այսօր էլ Մոսկվայից, Կրասնոդարից և Ռուսաստանի ամենատարբեր հատվածներից մարդիկ գալիս են ու ասում են, որ հատուկ եկել են Հայաստան, որ քվեարկեն «Քաղաքացիական պայմանագրի» կուսակցության օգտին։ Չգիտեմ` այդ մարդկանց ուղարկել են, թե իրենց որոշմամբ են եկել, սակայն Ռուսաստանում բնակվող ՀՀ քաղաքացիներից ով էլ գա, նրանց 65 և ավելի տոկոսը կողմ է քվեարկելու «Քաղաքացիական պայմանագրի» կուսակցության օգտին»,– հայտարարել է վարչապետը։