Ինչպես է Իրանի հոգևոր առաջնորդը հաղորդակցվում մարդկանց հետ

Ինչպես հայտնում է CNN-ը՝ հղում անելով ամերիկյան հետախուզությանը, պառակտված վարչակարգում իշխանության հստակ կառուցվածքը շարունակում է անորոշ մնալ, սակայն Մոջթաբա Խամենեին, հավանաբար, օգնում է ուղղորդել Իրանի և ԱՄՆ-ի միջև ընթացող բանակցությունները՝ ուղղված պատերազմի դադարեցմանը։

Խամենեին հանրությանը չի երևացել այն հարձակման պահից սկսած, որի հետևանքով պատերազմի սկզբում սպանվել էին նրա հայրն ու մի շարք ռազմական առաջնորդներ, իսկ ինքը՝ ստացել ծանր վիրավորում։ Աղբյուրների փոխանցմամբ՝ ԱՄՆ հետախուզությանը դեռևս չի հաջողվել տեսողականորեն հաստատել նրա գտնվելու վայրը։

Այս անորոշությունը պայմանավորված է նրանով, որ Խամենեին չի կիրառում կապի էլեկտրոնային միջոցներ։ Նա հաղորդակցվում է բացառապես իրեն անձամբ այցելողների հետ կամ սուրհանդակների միջոցով հաղորդագրություններ ուղարկելով։ Ըստ աղբյուրների՝ Խամենեին շարունակում է մնալ մեկուսացված և ստանալ բժշկական օգնություն ստացած վնասվածքների համար։ Նրա մարմնի մի կողմը, ներառյալ դեմքը, ձեռքը, իրանը և ոտքը, ստացել են ծանր այրվածքներ։