Ռուսաստանը համաձայնել է աջակցել Թրամփի նախաձեռնությանը. Ուշակով

Ռուսաստանի նախագահի օգնական Յուրի Ուշակովը հայտնել է, որ նախագահ Վլադիմիր Պուտինը և ԱՄՆ նախագահ Դոնալդ Թրամփը քննարկել են Հաղթանակի տոնի կապակցությամբ Ուկրաինայի հետ զինադադարի շուրջ ձեռք բերված պայմանավորվածությունը։ Ուշակովի խոսքով՝ հարցի վերաբերյալ համաձայնությունը կայացվել է ԱՄՆ վարչակազմի հետ հեռախոսային շփումների միջոցով, իսկ ամերիկյան կողմն իր հերթին կապ է հաստատել Կիևի հետ։

Նախագահի օգնականը նշել է, որ նախաձեռնության հիմքում երկու երկրների առաջնորդների վերջին հեռախոսազրույցն է։ Այդ ընթացքում նախագահները շեշտել են Երկրորդ համաշխարհային պատերազմում Ռուսաստանի և ԱՄՆ-ի դաշնակցային հարաբերությունները, ինչպես նաև դիտարկել Հաղթանակի տոնին զինադադար հայտարարելու հնարավորությունը։

«Կարևոր է, որ նախագահ Թրամփի նախաձեռնությունը նվիրված է հենց նացիզմի դեմ տարած հաղթանակի 81-րդ տարեդարձին՝ մեր սուրբ տոնին», - հավելել է Ուշակովը: