Պուտինը բացահայտել է` ինչ է խոսել Թրամփի հետ

Ռուսաստանի նախագահ Վլադիմիր Պուտինը Անվտանգության խորհրդի նիստի ժամանակ ներկայացրել է Դոնալդ Թրամփի հետ ունեցած զրույցի մանրամասները՝ կապված Երկրորդ համաշխարհային պատերազմում ԽՍՀՄ-ի և ԱՄՆ-ի դաշնակցության հետ։

ՌԴ նախագահը հայտնել է, որ վերջերս կայացած հեռախոսազրույցի ընթացքում ԱՄՆ առաջնորդի հետ անդրադարձել են ֆաշիզմի դեմ մղված ընդհանուր պայքարին։

 «Հիշում էինք այն մասին, որ մենք միասին ենք պայքարել նացիզմի դեմ և միասին ենք հաղթել», – նշել է Պուտինը։

Մայիսի 8-ին Դոնալդ Թրամփը հռչակագիր է ստորագրել, որով այդ օրը սահմանվել է որպես Եվրոպայում «չարիքի ու բռնապետության» դեմ ԱՄՆ-ի հաղթանակի տոն։ Ըստ այդ փաստաթղթի՝ նացիստական վարչակարգի դեմ պայքարում զոհվել է ավելի քան 250 000 ամերիկացի զինվոր։ Միացյալ Նահանգների նախագահը հորդորել է հարգել միլիոնավոր անմեղ զոհերի հիշատակը։

Վաշինգտոնում Ռուսաստանի դեսպան Ալեքսանդր Դարչիևն իր հերթին կարծիք է հայտնել, որ Հաղթանակի տոնը դրական ազդեցություն է ունենում երկկողմ հարաբերությունների վրա։ Դիվանագետի համոզմամբ՝ Մոսկվան և Վաշինգտոնը հետագայում կկարողանան հարաբերությունների կարգավորման «ճիշտ հետագիծ» գտնել։