Այս յուրահատուկ երևույթը ներմուծել են գործող իշխանությունները. Քոչարյան

Էջմիածնում կայացած նախընտրական քարոզարշավի ժամանակ Ռոբերտ Քոչարյանն ընդգծել է, որ Հայաստանի պատմության մեջ առաջին անգամ ընտրությունները վերածվել են պայքարի ազգային արժեքների, եկեղեցու ու ինքնության համար։

«Հայաստան» դաշինքի նախընտրական հավաքի ընթացքում Ռոբերտ Քոչարյանը նշել է, որ նախկինում ընտրությունները չեն եղել պայքար ինքնության, եկեղեցու և ազգային արժեքների համար, ինչպես նաև հիմնական խոսույթը չի եղել պատերազմի ու խաղաղության ընտրությունը։ Ըստ նրա՝ այս յուրահատուկ երևույթը ներմուծել են գործող իշխանությունները՝ տարանջատելով ժողովրդին ու պատմությունը, ինչի համար պետք է պատասխան տան։ Հավաքի ժամանակ շեշտվել է, որ Էջմիածինը դարեր շարունակ եղել է հայության արժեքների, հավատի և ինքնության պահապանը։

Դաշինքի անդամ Իշխան Սաղաթելյանը հայտարարել է. «Այսօր մեր ինքնությունը վտանգի տակ է, և այդ ինքնության կրողը, պաշտպանողը` Հայ առաքելական սուրբ եկեղեցին, վտանգված է և թիրախավորված։ Այսօր Հայաստանի տարածքային ամբողջականությունը խաթարված է, ինքնիշխանությունը՝ վտանգված, հանձնված օտարներին, որոնք Հայաստանի վարչախմբի հետ պայքարում են մեր ինքնության դեմ»։

«Հայաստան» դաշինքը ներկայացրել է իր 6 սկզբունքները՝ անվտանգ և մրցունակ Հայաստան, համերաշխություն, ազգային ինքնության վրա հիմնված պետություն, համահայկականություն, աշխատանք և գիտություն։