14:00 Լուրերը մեկ տողով. Պաշտոնանկությունների շղթա, Մոսկվայի ուղերձները և փակ օդանավակայաններ

Անցած ժամվա լուրերը՝ հակիրճ և բովանդակային.

•Արարատի մարզի դատախազն ազատվել է պաշտոնից՝ համալրելով մարզային իրավապահ համակարգի պաշտոնանկությունների շարքը: Գործընթացը հաջորդել է Վեդիում տեղի ունեցած աղմկահարույց հանցագործության դեպքին:

•Կառավարությունը նախատեսում է ներդնել կաթի արտադրության սուբսիդավորման նոր ծրագիր: Շեշտադրվում է նաև ժամանակակից խելացի անասնագոմերի զարգացման կարևորությունը: Այս մասին հայտարարել է վարչապետ Նիկոլ Փաշինյանը: 

•«Լուսավոր Հայաստան» Կուսակցության նախագահ Էդմոն Մարուքյանը պարզաբանել է, թե` ինչու են նախընտրական քարոզարշավը սկսել հենց Երասխից: Նա նշել է, որ իրենց համար առանցքային ու հիմնարար նշանակություն ունի Հայաստանի Սահմանադրության առաջին հոդվածը, որը վերաբերում է երկրի ինքնիշխանությանը։ 

•«Բարգավաճ Հայաստան» կուսակցության ղեկավար Գագիկ Ծառուկյանը ասել է. «Ոչ ոք կռիվ չի ուզում։ Մենք կռվի դուռը պետք է փակենք, ամուր փակենք, որ դրա մասին չմտածենք»։

•Բեռլինի ներքաղաքական խնդիրները սկսել են բացասաբար ազդել Եվրամիության որոշումների կայացման վրա: Գերմանիայի դիրքորոշման բացակայությունը դանդաղեցնում է մի շարք ոլորտների կարգավորումը:

•Ռուսաստանի նախագահը Հաղթանակի տոնի առթիվ ուղերձներ է հղել ԱՊՀ երկրների, այդ թվում՝ Հայաստանի ղեկավարներին: Շնորհավորանքներ են հասցեագրվել նաև տարբեր ժողովուրդների:

•Ռուսաստանի արտաքին գործերի նախարարությունը հայտարարել է Եվրոպայից բխող հնարավոր ռազմական սպառնալիքների մասին: Մոսկվան արևմտյան կոչերը որակում է որպես ռազմավարական պարտություն հասցնելու փորձ:

•ԱԹՍ-ների հարվածների պատճառով Ռուսաստանի հարավային 13 օդանավակայաններ ժամանակավորապես դադարեցրել են աշխատանքը: Սահմանափակումները կգործեն առնվազն մինչև մայիսի 12-ը:

•Ռուսական լրատվամիջոցները հայտնել են Մոսկվայում Հայաստանի դեսպանին ԱԳՆ կանչելու մասին: Պաշտոնական Երևանն առայժմ զերծ է մնում այս տեղեկության մեկնաբանությունից: