ՌԴ ԱԳՆ-ն կանչել է ՀՀ դեսպանին՝ Երևանում Զելենսկու հայտարարություններից հետո

Ռուսաստանի Դաշնության արտաքին գործերի նախարարության մամուլի ծառայությունը տեղեկացնում է, որ Հայաստանի դեսպան Գուրգեն Արսենյանը կանչվել է գերատեսչություն։ 

ՌԴ արտաքին գործերի փոխնախարար Միխայիլ Գալուզինի հետ կայացած հանդիպման ընթացքում դեսպանին հայտնել են, որ անընդունելի է Ուկրաինայի նախագահ Վլադիմիր Զելենսկուն Հայաստանում «հարթակ» տրամադրելը ԵՄ հովանու ներքո անցկացված վերջին միջոցառումների շրջանակում, որտեղ հնչել են «Ռուսաստանի դեմ ահաբեկչական սպառնալիքներ»։

Նախարարության տարածած հաղորդագրության համաձայն՝ Մոսկվան «արդարացիորեն վրդովված է այս կապակցությամբ և պաշտոնական Երևանի կողմից վերոնշյալ այցելուի նման անպարկեշտ վարքագծի պատշաճ բացասական գնահատականի բացակայությունը համարում է անհամատեղելի հայ-ռուսական հարաբերությունների գործընկերային բնույթի հետ»։ Ըստ ՌԴ ԱԳՆ-ի՝ դեսպանը հավաստիացրել է, որ ռուսական կողմի պնդումների մասին կզեկուցի Երևանին։

Հիշեցնենք` ավելի վաղ ՌԴ ԱԳՆ-ն Հայաստանի հասցեին մեղադրանքներ էր հնչեցրել` հայտարարություն տարածելով: