Ամերիկյան բանկի աշխատակցուհին անջատել է Հռոմի Պապի հեռախոսազանգը

Ամերիկյան բանկերից մեկի տեխնիկական սպասարկման բաժնի աշխատակիցն անջատել է հեռախոսը Հռոմի Պապ Լևոն Տասնչորսերորդի հետ խոսելիս, երբ նա ներկայացել է։ Այս մասին հայտնում է «Դը Նյու Յորք Թայմսը»՝ վկայակոչելով Իլինոյսից քահանա Թոմ Մակքարթիին, ով երկար տարիներ մտերիմ է Պապի հետ։

Ըստ Մակքարթիի՝ դեպքը տեղի է ունեցել Լևոն Տասնչորսերորդի գահակալումից մոտ երկու ամիս անց։ Պապը զանգահարել է ԱՄՆ-ում գործող բանկ՝ հեռախոսահամարն ու հասցեն փոփոխելու նպատակով։ Նա հանդես է եկել իր աշխարհիկ անունով՝ Ռոբերտ Պրևոստ։

Թեև պոնտիֆիկը ճշգրիտ է պատասխանել անվտանգության ստուգիչ հարցերին, բանկի աշխատակցուհին նշել է, որ դա բավարար չէ, և պահանջել է անձամբ այցելել ԱՄՆ-ում գտնվող բանկի մասնաճյուղ։

«Ես չեմ կարող դա անել։ Չէ՞ որ ես պատասխանել եմ բոլոր ստուգիչ հարցերին»,- արձագանքել է նա։

Պապը փորձել է պարզաբանել իր չներկայանալու պատճառը։ 

«Արդյո՞ք դա նշանակություն կունենար, եթե ես ասեի, որ ես Պապ Լևոնն եմ»,- հարցրել է նա։

Այս խոսքերից հետո բանկի աշխատակիցն անջատել է զանգը։ Հայտնի չէ, թե ինչպես է հանգուցալուծվել իրավիճակը և արդյոք Պապին հաջողվել է հեռավար փոխել տվյալները։

Լևոն Տասնչորսերորդն ընտրվել է Հռոմի Պապ 2025 թվականի  մայիսին՝ Ֆրանցիսկոս Պապի մահից հետո։ Նա պատմության մեջ առաջին պոնտիֆիկն է, ով ներկայացնում է Միացյալ Նահանգները։