Իրանը չի պատասխանել ԱՄՆ-ի խաղաղության նոր առաջարկին

Իրանը պաշտոնապես դեռևս չի արձագանքել ամերիկյան կողմի ներկայացրած մեկ էջանոց և 14 կետից բաղկացած խաղաղության առաջարկին։ Այս մասին, հղում անելով իրազեկ աղբյուրին, հայտնել է Tasnim գործակալությունը:

Աղբյուրը հայտարարել է, որ ի հեճուկս «Աքսիոսի» պնդումների, թե կողմերը մոտ են պատերազմի դադարեցման համաձայնագրին, Իրանը դեռ պաշտոնական պատասխան չի տվել Վաշինգտոնի վերջին նախագծին։ Նշվում է, որ ամերիկյան առաջարկը պարունակում է մի շարք անընդունելի դրույթներ։ Ըստ աղբյուրի՝ ամերիկյան լրատվամիջոցների հրապարակումները փորձ են՝ արդարացնելու Դոնալդ Թրամփի հրաժարումը Հորմուզի նեղուցի հետ կապված նախնական պլանից։

Հայտնվում է նաև, որ Իրանը Պակիստանի միջոցով ԱՄՆ-ին էր փոխանցել 14 կետից բաղկացած տրամաբանական առաջարկներ, ինչից հետո ամերիկյան կողմը ներկայացրել է իր սեփական ծրագիրը։ Մինչ իրանական կողմն աշխատում էր պատասխանի վրա, ԱՄՆ-ի ձեռնարկած չմտածված քայլերը հանգեցրել են քննարկումների կասեցմանը։ Սակայն Թրամփի կողմից նախնական մտադրությունից հրաժարվելուց հետո, Իրանը վերսկսել է առաջարկների դիտարկումը։ Վերջնական որոշումը կրկին կփոխանցվի Պակիստանի միջոցով։

Ըստ գործակալության՝ իրանական պատվիրակության քննարկումների առանցքում պատերազմի դադարեցումն է, իսկ միջուկային թեման այս փուլում օրակարգում չէ։