09:00 Լուրերը մեկ տողով. Բելառուսի «հարվածը» Երևանին, Մակրոնի հրաժեշտը. ամենաթեժ իրադարձությունները՝ ՀՀ-ում և աշխարհում

Անցած ժամվա լուրերը՝ հակիրճ և բովանդակային.

•Բելառուսի ԱԳՆ-ն բողոքի նոտա է հղել Հայաստանին՝ ԱԺ նախագահի կողմից հնչեցված «ոչ բարեկամական» հայտարարությունների և երկրի ներքին կառավարման վերաբերյալ համեմատությունների պատճառով։

•Ֆրանսիայի նախագահն ավարտել է պետական այցը Հայաստան, որի շրջանակում Գյումրիում մասնակցել է մշակութային միջոցառումների և վերահաստատել երկու երկրների պատմական բարեկամությունը։

•Ռումինիայի նախագահը կառավարությանն անվստահություն հայտնելու և ստեղծված քաղաքական ճգնաժամի պատճառով շտապ լքել է Երևանն ու վերադարձել Բուխարեստ։

•Որոշել եմ դառնալ վարչապետ, որ դուք ունենաք լավ ապագա, ունենաք լավ կրթություն, հետագայում ունենաք լավ աշխատանք, դրա համար մենք ամեն ինչ անում ենք, այս մասին ասել է «Ուժեղ Հայաստան» կուսակցության առաջնորդ Սամվել Կարապետյանը: 

•Հայաստանի և Թուրքիայի հատուկ ներկայացուցիչները քննարկել են Գյումրի-Կարս երկաթուղու և պատմական Անիի կամրջի վերականգնման հեռանկարները՝ կարևորելով տարածաշրջանային կապերի զարգացումը։

•ԱՄՆ վարչակազմը խստացնում է ճնշումն Իրանի նկատմամբ՝ կանխատեսելով երկրի ֆինանսական համակարգի փլուզումը և սպառնալով պատժամիջոցներով բոլոր աջակից սուբյեկտներին։

•Վաշինգտոնը ժամանակավորապես դադարեցրել է նավերի ուղեկցման «Ազատության նախագիծ» գործողությունը՝ Թեհրանի հետ համաձայնության հնարավորությունը ստուգելու համար, մինչդեռ Իրանը զգուշացնում է նեղուցում սեփական կանոնների մասին։

•ԱՄՆ փոխնախագահ Ջեյ Դի Վենսի պնդմամբ՝ շուրջ 186 հազար ամերիկացիներ, համարվելով մահացած դեռ շարունակում են սննդի կտրոններ ստանալ։

•Ռուսաստանի ԱԳՆ-ն հայտարարել է Ուկրաինայի հարցով բանակցություններին պատրաստ լինելու մասին, եթե դրանք հանգեցնեն իրական և էֆեկտիվ արդյունքների։

•Ծանրորդ Նարեկ Մկրտչյանը Եգիպտոսում ընթացող երիտասարդների աշխարհի առաջնությունում նվաճել է արծաթե մեդալ՝ երկամարտում գրանցելով 336 կգ արդյունք։

•Հայաստանում սպասվում է ջերմաստիճանի անկում և տեղումներ. լեռնային շրջաններում հնարավոր է թաց ձյուն, իսկ մայրաքաղաքում՝ կարճատև անձրև ու ամպրոպ։