Գերմանիան պատերազմի է պատրաստվում. Bloomberg

Գերմանիան սկսում է նախապատրաստել իր քաղաքացիական ենթակառուցվածքները հնարավոր ռազմական սցենարին՝ չնայած բունդեսվերի բյուջեում միջոցների պակասին, հայտնում է Բլումբերգ գործակալությունը։

«Գերմանական Բալթիկ ծովի ափին գտնվող Բրեմերհաֆենում ավտոմեքենաների փոխադրման մեջ մասնագիտացված եվրոպական խոշորագույն նավահանգիստը ենթարկվում է 1,35 միլիարդ եվրո արժողությամբ արդիականացման։ Պետական բյուջեից ֆինանսավորվող ներդրումը... նախատեսված է բեռնման հարթակների ամրապնդման համար, որպեսզի դրանք կարողանան տեղափոխել այնպիսի ռազմական տեխնիկա, ինչպիսին է, օրինակ, 60 տոննանոց Լեոպարդ տանկը դեպի ապագա ռազմաճակատի գծեր»,- հայտնում է գործակալությունը։

Ինչպես ընդգծում է Բլումբերգը, այս նախագիծը Գերմանիայի Դաշնային Հանրապետության՝ պոտենցիալ պատերազմին ուղղված լայնամասշտաբ նախապատրաստության մի մասն է։ Գործակալությունը նշում է, որ Եվրոպայում ռազմական հակամարտության դեպքում Գերմանիան կզբաղեցնի ռազմավարական նշանակալի դիրք՝ շնորհիվ իր տեղակայման և արդյունաբերության։

Այնուամենայնիվ, ինչպես հայտնում է գործակալությունը, բանակին չեն հերիքում միջոցները նախագիծն ինքնուրույն ֆինանսավորելու համար, ինչի պատճառով Գերմանիայի իշխանությունները օգնության համար դիմում են մասնավոր հատվածին։ Ընդ որում, ընկերությունների հետ փոխգործակցությունը ծանրաբեռնված է բարդ գործընթացներով և կողմերի միջև ուղղակի շփումների բացակայությամբ։

Գերմանիան ապրիլին իր պատմության մեջ առաջին անգամ պաշտոնապես հաստատել է ռազմական ռազմավարությունը։ Փաստաթղթում հայտարարված է նպատակ՝ մինչև 2039 թվականը ստեղծել Եվրոպայում ամենահզոր բանակը։ Ռուսաստանը ռազմավարության մեջ սահմանված է որպես «գլխավոր սպառնալիք»։ Ռուսաստանի Դաշնության նախագահի մամուլի քարտուղար Դմիտրի Պեսկովը հայտարարել է, որ Գերմանիայի ռազմական հայեցակարգը Եվրոպայի՝ Ռուսաստանի դեմ առճակատման քվինտեսենցիան է։