19:00 Լուրերը մեկ տողով. Իրանի սպառնալից նախազգուշացումը, «Վերջին զանգի» խիստ արգելքները, ադրբեջանական բենզին

Անցած ժամվա լուրերը՝ հակիրճ և բովանդակային.


•Վարչապետ Նիկոլ Փաշինյանը բացառել է զինվորական ծառայության ժամկետի կրճատումը 2026-ից առաջ զորակոչվածների համար՝ նշելով, որ դա կխաթարի բանակի ֆունկցիոնալությունը։

•Աղվերանում տեղի է ունեցել Հայաստանի և Ադրբեջանի սահմանազատման հանձնաժողովների հանդիպումը, որի ընթացքում համաձայնեցվել են աշխատանքային ուղեցույցներ և քննարկվել առևտրատնտեսական կապերը։

•Հայաստանի և Ադրբեջանի գործարար շրջանակները քննարկել են բեռների տարանցման և վառելիքի մատակարարման հարցեր, որին մասնակցել են խոշոր հայկական ընկերությունների ներկայացուցիչներ։

•Ընդդիմադիր պատգամավոր Արթուր Խաչատրյանը Ադրբեջանի փոխվարչապետի այցը որակել է որպես իշխանությունների կողմից իրականացվող քարոզչական քայլ՝ խաղաղության պատրանք ստեղծելու նպատակով։

•Էկոնոմիկայի նախարար Գևորգ Պապոյանը հակադարձել է Ռոբերտ Քոչարյանի կոռուպցիոն մեղադրանքներին՝ հորդորելով բիզնես արտոնություններից օգտվողներին հաստատել կամ հերքել այդ պնդումները։

•Իրանի ԱԳՆ-ն հայտարարել է բարձր զգոնության պահպանման և պաշտպանական պատրաստվածության մասին՝ ընդգծելով ԱՄՆ-ի և Իսրայելի հետ շարունակվող հակամարտությունը։

•ԿԳՄՍ նախարարությունը հրահանգել է բացառել ցանկացած դրամահավաք «Վերջին զանգի» միջոցառումների ժամանակ, որոնք  նախատեսված է անցկացնել մայիսի 22–ին՝ 5–օրյա աշխատանքային շաբաթվա դեպքում, մայիսի 23–ին՝ 6–օրյա շաբաթվա դեպքում: