Իրավիճակը լարված է․ Իրանի ՊՆ-ն հայտարարություն ունի

Իրանի պաշտպանության փոխնախարար Ռեզա Թալայինիկը Բիշքեկում հայտարարել է Հորմուզի նեղուցով նավարկության իրականացման նոր մոտեցումների մասին:

Բիշքեկում կայացած Շանհայյան համագործակցության կազմակերպության (ՇՀԿ) անդամ պետությունների պաշտպանության նախարարների հանդիպման ժամանակ Իրանի պաշտպանության փոխնախարար Ռեզա Թալայինիկը ներկայացրել է Հորմուզի նեղուցով նավերի անցման նոր կարգերը։ Պաշտոնական Թեհրանի դիրքորոշման համաձայն՝ հակամարտության ավարտից հետո նեղուցով տարանցումը տեղի կունենա միայն Իրանի սահմանած նորմերի ու անվտանգության արձանագրությունների հիման վրա։

Նոր կանոնները հիմնականում տարածվելու են առևտրային նավերի վրա, որոնք պարտավորված կլինեն հետևել Իրանի ազգային անվտանգությունն ապահովող ընթացակարգերին։ Հիշեցվում է, որ նախկինում Իրանը հայտնել էր Օմանի հետ նավարկության նոր ռեժիմ ստեղծելու մտադրության մասին։ Բացի այդ, իրանական կողմը ծրագրում է վճարներ գանձել նեղուցի շահագործման համար, ինչի նպատակով Իրանի կենտրոնական բանկն արդեն տարբեր արժույթներով համապատասխան հաշվեհամարներ է բացել։

Տարածաշրջանային իրավիճակը սրվել էր փետրվարի վերջին, երբ ԱՄՆ-ն ու Իսրայելը հարվածներ էին հասցրել Իրանի տարածքում գտնվող օբյեկտներին։ Չնայած ապրիլի 8-ին հաստատված երկշաբաթյա հրադադարին և Իսլամաբադի բանակցություններին՝ կողմերը վերջնական համաձայնություն չեն ձեռք բերել։ Այս պահին ԱՄՆ-ն շրջափակման մեջ է պահում իրանական նավահանգիստները, ինչին ի պատասխան Թեհրանը վերականգնել է Հորմուզի նեղուցի ռազմական վերահսկողության ռեժիմը։