Ապօրինի պահվող հրազենից առնվազն 5 կրակոց է արձակել, հայհոյանքներ են հնչեցրել․ ՔԿ-ն մանրամասնում է

ՀՀ քննչական կոմիտեի իրականացրած նախաքննությամբ փաստական տվյալներ են ստացվել այն մասին, որ 2025 թվականի օգոստոսի 14-ին Երևան-Աշտարակ մայրուղու՝ դեպի Պռոշյան բնակավայր տանող կամրջի տակ տեղի է ունեցել Մ. Դ.-ի և Ա. Տ.-ի կողմնակիցների հանդիպումը։ Այդ ընթացքում կողմերը միմյանց հասցեին հայհոյանքներ են հնչեցրել և հարվածներ հասցրել միմյանց։

Միջադեպի ժամանակ Ա․ Տ․-ն իր մոտ ապօրինի պահվող հրազենից առնվազն 5 կրակոց է արձակել հակառակորդ խմբի ուղղությամբ, ինչի հետևանքով Մ․ Դ․-ն ստացած վերքերից մահացել է:

Ա․ Տ․-ի նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 155-րդ հոդվածի 2-րդ մասի 7-րդ կետով (սպանություն՝ այլոց կյանքի համար վտանգավոր եղանակով) և 335-րդ հոդվածի 1-ին մասով (հրազենի և ռազմամթերքի ապօրինի շրջանառություն)։ Որպես խափանման միջոց նրա նկատմամբ ընտրվել է կալանավորումը։

Քրեական վարույթի նյութերը մեղադրական եզրակացությամբ փոխանցվել են հսկող դատախազին՝ այն հաստատելու և դատարան ուղարկելու միջնորդությամբ։