ԱՄԷ-ն որոշել է լքել ՕՊԵԿ-ը

Արաբական Միացյալ Էմիրությունները հայտարարել են ՕՊԵԿ-ից դուրս գալու որոշման մասին, որն ուժի մեջ կմտնի սույն թվականի մայիսի 1-ից։ Ըստ երկրի պաշտոնական` WAM լրատվական գործակալության տարածած հայտարարության, այս քայլը պայմանավորված է պետության ազգային շահերով, ինչպես նաև ներդրողների և գործընկերների առջև ստանձնած պարտավորություններով։ Էմիրությունների իշխանությունները նշել են, որ ժամանակն է կենտրոնանալ սեփական էներգետիկ հատվածի զարգացման ռազմավարական տեսլականի վրա։

Այս որոշումը կայացվել է համաշխարհային էներգետիկ շուկայում լարվածության աճի և Իրանի կողմից Հորմուզի նեղուցի շրջափակման հետևանքով առաջացած ճգնաժամի ֆոնին։ ԱՄԷ-ն պարզաբանել է, որ կազմակերպությունից դուրս գալը հնարավորություն կտա ավելի ճկուն արձագանքել շուկայի փոփոխվող պահանջներին և ակտիվորեն նպաստել էներգակիրների մատակարարման կայունությանը, հատկապես Արաբական ծոցում տիրող աշխարհաքաղաքական անկայունության պայմաններում։

Չնայած անդամակցության դադարեցմանը, Էմիրությունները վերահաստատել են իրենց հավատարմությունը համաշխարհային շուկայի կայունությանը և պատրաստակամությունը՝ շարունակելու համագործակցությունը թե՛ արտադրողների, թե՛ սպառողների հետ։ Հայտարարության մեջ ընդգծվում է, որ երկիրը երկար տարիներ զգալի ներդրում է ունեցել ՕՊԵԿ-ի գործունեության մեջ, սակայն ներկայիս իրավիճակը պահանջում է նոր մոտեցումներ՝ էներգետիկ ապագան առավել արդյունավետ կառավարելու համար։