Ռուսաստանը հավերժ է․ Վլադիմիր Պուտին

Օրենսդիրների խորհրդի նիստի ժամանակ Ռուսաստանի Դաշնության նախագահ Վլադիմիր Պուտինը խոսել է երկրի իրավական համակարգի բարեփոխման անհրաժեշտության մասին։ Իր ելույթում պետության ղեկավարն ընդգծել է, որ արդի մարտահրավերներին դիմակայելու նպատակով հայրենական օրենսդրությունը պետք է դառնա առավել առաջադեմ և դինամիկ։

Նախագահի պնդմամբ՝ ստեղծված բարդ իրավիճակում չի կարելի կենտրոնանալ միայն սահմանափակող քայլերի վրա։ Պուտինը նկատել է, որ ավելորդ իրավական ու վարչական խոչընդոտները դանդաղեցնում են պետության առաջընթացը, մինչդեռ օրենքների նպատակը պետք է լինի ապագա զարգացման հեռանկարների ապահովումը։

Անդրադառնալով երկրի առջև ծառացած աննախադեպ ռիսկերին՝ ՌԴ նախագահը համոզմունք է հայտնել, որ դրանք հնարավոր է հաղթահարել։ Նա շեշտել է, որ առկա դժվարությունները կրում են ժամանակավոր բնույթ, իսկ պետության հիմքերը մնում են անսասան։ 

«Ավելորդ արգելքները դանդաղեցնում են զարգացումը։ Այս ամենը ժամանակավոր, անցողիկ երևույթներ են։ Իսկ Ռուսաստանը հավերժ է։ Եվ մեր օրենսդրությունը պետք է լինի ճկուն, դինամիկ, առաջադեմ և ուղղված դեպի ապագան»,- ասել է Ռուսաստանի Դաշնության նախագահ Վլադիմիր Պուտինը։