Հայաստանի հյուսիսն ու հարավը կարող են կապվել Նախիջևանի երկաթուղով. Կոստանյան

«Խաղաղության խաչմերուկ» (ԹՐԻՓ) նախագծի գործնական նշանակության մասին World Policy Conference-ի պանելային քննարկման ժամանակ հայտարարել է ՀՀ փոխարտգործնախարար Վահան Կոստանյանը։ Նա պարզաբանել է, որ ծրագիրն ամբողջությամբ պատկանում է Հայաստանին, և երկիրը մեծապես շահագրգռված է տարածաշրջանային հաղորդակցությունների վերագործարկմամբ։

Ըստ փոխնախարարի՝ ԹՐԻՓ-ը ռազմավարական նախագիծ է, որը Կենտրոնական Ասիան կապում է Եվրոպայի հետ և ապահովում փոխադարձ շահեր։ Դրա իրականացմամբ հնարավորություն կստեղծվի կապ հաստատել ոչ միայն Արևելքի ու Արևմուտքի, այլև Պարսից ծոցի և Սև ծովի միջև։ Գործնականում սա թույլ կտա Նախիջևանի երկաթուղով միացնել Հայաստանի հարավային ու հյուսիսային շրջանները։

Կոստանյանը տեղեկացրել է, որ ամերիկյան կողմի հետ բանակցություններ են ընթանում հայ-ամերիկյան համատեղ ձեռնարկություն հիմնելու շուրջ։ Արդեն մեկնարկել են տեխնիկա-տնտեսական հիմնավորման նախապատրաստական աշխատանքները։ Որպես տարածաշրջանային համագործակցության օրինակ՝ նա մատնանշել է օգոստոսի 8-ից հետո Ադրբեջանի և Վրաստանի երկաթուղիներով Ղազախստանից ցորենի ներկրման նախադեպը։

Հայաստանի և Ադրբեջանի հարաբերությունների համատեքստում փոխնախարարը նշել է, որ ընթանում է «խաղաղության ինստիտուցիոնալացում»։ Երկու երկրները սկսել են ուղիղ առևտուր. Հայաստանն արդեն վառելիք է ներկրում Ադրբեջանից, իսկ առաջիկայում կհստակեցվի Ադրբեջան արտահանվող հայկական ապրանքների ցանկը։ Բացի տնտեսական կապերից, իրականացվում են նաև քաղաքացիական հասարակության ներկայացուցիչների փոխադարձ հանդիպումներ։

Վահան Կոստանյանը նաև ընդգծել է Վրաստանի հետ եռակողմ խորհրդակցությունների ձևաչափի կարևորությունը և տարածաշրջանային լայն համագործակցության հեռանկարները։