ՏԵՍԱՆՅՈՒԹ. Խուճապ` Ստամբուլի սրճարանում

Ստամբուլի սրճարաններից մեկում մեքենայի աուդիոհամակարգի ձայնը երկրաշարժի կեղծ խուճապ է առաջացրել։

Շաբաթ երեկոյան Ստամբուլի սրճարաններից մեկի այցելուները, վախենալով երկրաշարժից, հապշտապ դուրս են վազել փողոց, սակայն պարզվել է, որ պատճառը մոտակայքով անցնող մեքենայի հզոր ձայնային համակարգն է։ Այս մասին կիրակի օրը տեղեկացրել է «Birgün» պորտալը։

Տեսահսկման սարքերի ձայնագրության մեջ երևում է, թե ինչպես են սեղանի խաղով զբաղված տղամարդիկ հանկարծակի տագնապում և շտապ լքում հաստատությունը՝ դռների մոտ առաջացնելով խցանում։

Սրճարանի այցելու Օրհան Քեսքինը պատմել է պարբերականին, որ շենքն ու ապակիները սկսել են ուժգին ցնցվել։ «Բոլորը կարծեցին, թե դա երկրաշարժ է, ես առաջիններից մեկը դուրս վազեցի»,- նշել է նա՝ հավելելով, որ ներսում մեծ խուճապ է եղել, իսկ հետո անցորդներն են հայտնել, որ իրականում ցնցումներ չեն եղել։ Պարզվել է, որ ապակիների ցնցումն առաջացել է շենքին մոտեցած ավտոմեքենայի չափազանց հզոր աուդիոհամակարգից։

Նշվում է, որ մեկ տարի առաջ՝ 2025 թվականի ապրիլի 23-ին, Մարմարա ծովում գրանցվել էր 6,2 մագնիտուդ ուժգնությամբ երկրաշարժ, որի հետևանքով տուժել էր 236 մարդ։