Նոր մանրամասներ՝ Սպիտակ տան հրաձգությունից․ կասկածվողը խոսել է

Կալիֆոռնիայի Տորանս քաղաքի 31-ամյա բնակիչ Քոուլ Թոմաս Ալենը զինված է եղել որսորդական հրացանով, ատրճանակով ու դանակներով։ CBS News-ը նշում է, որ նա հավանաբար գործել է միայնակ և եղել է Վաշինգտոն Հիլթոն հյուրանոցի հյուր։ 

Ձերբակալությունից հետո Ալենը իրավապահներին ասել է, որ ցանկացել է գնդակահարել Թրամփի վարչակազմի պաշտոնյաներին։ Կասկածյալը չի նշել, որ թիրախը հենց Թրամփն է, այլ խոսել է միայն վարչակազմի անդամների մասին։ 

Նշենք՝ նա 2017-ին ավարտել է Կալիֆոռնիայի տեխնոլոգիական ինստիտուտը՝ ստանալով մեքենաշինության բակալավրի աստիճան, իսկ նախորդ տարի մագիստրոսի կոչում է ստացել Դոմինգես Հիլսի Կալիֆոռնիայի պետական համալսարանում։

Դեպքից հետո Դոնալդ Թրամփը հայտնել է, որ ուզում էր շարունակել միջոցառումը, բայց իրավապահները պնդել են չեղարկել ընթրիքը։ Նա նշել է, որ կրակոցի ձայնը նմանեցրել է ընկնող սկուտեղի, սակայն միջադեպը բավականին տրավմատիկ է եղել Մելանիա Թրամփի համար։ ԱՄՆ նախագահը գովել է իրավապահների արագ աշխատանքը և խոստացել միջոցառումն անցկացնել մեկ այլ օր։