Նրա համար է, որ Կտրիճ Ներսիսյանի զարմիկները G դասի Mercedes-ով պտտվեն, թե՞ եկեղեցու կարիքների. վարչապետ

Վարչապետ Նիկոլ Փաշինյանը հայտարարել է, որ հոգևորականները, ինչպես և բոլոր քաղաքացիները, պետք է եկամտահարկ վճարեն, քանի որ բոլորը հավասար են օրենքի առջև։

Ճեպազրույցի ընթացքում վարչապետը նշել է, որ չկա որևէ կարգավորում, ըստ որի հոգևորականները դուրս են օրենքից։ Նրա խոսքով՝ արդեն ութ տարի է հայտնվում է պատրաստակամություն, որ Հայաստանյայց Առաքելական եկեղեցու գործունեությունից գանձված հարկերը լիարժեք վերադարձվեն՝ նաև ֆինանսական թափանցիկությունն ապահովելու համար։

Նիկոլ Փաշինյանը հարցադրում է արել, թե ինչու պետք է չհարկվեն եկեղեցու համար ներմուծվող այն ապրանքները, օրինակ՝ սուրճը, որոնք զուտ ծիսական նշանակություն չունեն։ Վարչապետն ընդգծել է նաև մոմի վաճառքից ստացվող շրջանառության թափանցիկության կարևորությունը։

«Ինչո՞ւ պետք է Հայաստանյայց Առաքելական եկեղեցու հետևորդները չիմանան, որ, օրինակ, մոմի վաճառքն ինչքան շրջանառություն է ապահովում, հետո ի՞նչ են լինում այդ փողերը։ Դա նրա համար է, որ, օրինակ, Կտրիճ Ներսիսյանի զարմիկները G դասի Mercedes-ով պտտվեն, թե՞ եկեղեցու կարիքների համար է»,- ասել է Նիկոլ Փաշինյանը։