Փոփոխություններ՝ Առողջության համընդհանուր ապահովագրության փաթեթում․ նոր խմբեր կընգրկվեն

Խորհրդարանը քննարկում է Կառավարության ներկայացրած՝ Առողջության համընդհանուր ապահովագրության մասին օրենքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթն առաջին ընթերցմամբ ընդունելու մասին հարցը։

Հիմնական զեկուցող, ՀՀ առողջապահության նախարարի տեղակալ Լենա Նանուշյանը հիշեցրել է, որ արդեն 3 ամիս է՝ գործում է Առողջության համընդհանուր ապահովագրության նոր համակարգը, և, նրա ձևակերպմամբ, «3 ամսական նորածին ունենք»։

««Առողջության համընդհանուր ապահովագրության մասին» օրենքում առաջարկում ենք մի շարք փոփոխություններ իրականացնել, առաջին հերթին՝ ավելացնել մի շարք խմբեր ընդհանուր խմբերի ցանկում: Առաջինը էլեկտրոնային հարթակով իրականացնող ուղևորափոխադրման ծառայության փոխադրողներին, վարորդներին, սկսած մյուս տարվա հունվարի 1-ից թույլ տալ, որպեսզի իրենք էլ կարողանան մասնակից լինել այս համակարգին»,- պարզաբանել է նա:

Լենա Նանուշյանը տեղեկացրել է, որ ընդլայնվում է նաև ՀՀ պաշտպանության ժամանակ զինծառայողների կյանքին կամ առողջությանը պատճառած վնասների հատուցման մասին օրենքի իմաստով շահառու ճանաչված անձանց շրջանակը։

Առաջարկվող հաջորդ փոփոխությունը վերաբերում է ապահովագրված անձանց փոխկապակցված անձանց։

«Ինչպես գիտեք, օրենքը հաստատվելուց փոխկապակցված անձինք արդեն կարող էին ապահովագրվել՝ սկսած 2028 թվականից, բայց քանի որ տարբեր շահառուներից, որոնք արդեն իսկ հանդիսանում են ապահովագրության շահառու և, գոհ լինելով տրամադրված համակարգի ծառայություններից, իրենք են առաջարկել, որպեսզի փոխկապակցված անձինք, այսինքն՝ իրենց ընտանիքի անդամները, որոնք ներգրավված չեն ապահովագրության համակարգում, կարողանան նույնպես վճարել և մասնակցել ապահովագրության այդ համակարգի շրջանակում տրամադրվող ծառայություններին»,- նշել է առողջապահության նախարարի տեղակալը:

Հաջորդ փոփոխությամբ առաջարկվում է ապահովագրավճար վճարող անհատ ձեռնարկատերերի համար գործող վերջնաժամկետը այս տարվա ապրիլի 20-ի փոխարեն սահմանել հուլիսի 20-ը՝ նրանց ապահովագրավճարների կատարման պատշաճ ապահովման նպատակով։

Փաթեթում առաջարկվող մյուս փոփոխությունը վերաբերում է Բնակչության բժշկական օգնության և սպասարկման օրենքին։