Նեթանյահուն շնորհավորել է Թրամփին. Իրանը կրկին ձախողեց

Իսրայելի վարչապետ Բենիամին Նեթանյահուն շնորհավորել է ԱՄՆ նախագահ Դոնալդ Թրամփին ամերիկացի օդաչուի փրկության կապակցությամբ։

«Սա ցույց է տալիս, որ երբ ազատ հասարակությունները խիզախություն են դրսևորում, նրանք որոշում են դիմակայել անհաղթահարելի թվացող խոչընդոտներին և հաղթել խավարի ու ահաբեկչության ուժերին։ Այս փրկարարական գործողությունը հաստատում է սրբազան սկզբունքը՝ ոչ ոք միայնակ չի մնում։ Սա ընդհանուր արժեք է, որը մեր երկրները կրկին ու կրկին ցուցադրում են»,- նշել է Իսրայելի վարչապետը:

Ավելի վաղ ԱՄՆ նախագահը հայտարարել էր, որ Իրանի երկնքում խոցված F-15 կործանիչի օդաչուն փրկվել է:

Axios-ի հետ զրուցած ամերիկացի պաշտոնյաների փոխանցմամբ՝ իրականացվել է բարդ և ամբողջական գործողություն։ Նշվել է, որ գործողության բոլոր մասնակիցները, այդ թվում՝ օդաչուն, այժմ գտնվում են Իրանի սահմաններից դուրս։

Միաժամանակ հիշեցվում է, որ Իրանի ԻՀՊԿ-ն հերքել է Վաշինգտոնի հայտարարությունները օդաչուի փրկության մասին՝ պնդելով, որ գործողությունն ամբողջությամբ ձախողվել է, իսկ իրանական կողմը խոցել է ԱՄՆ երկու ուղղաթիռ և երկու ռազմատրանսպորտային ինքնաթիռ։