Իրանում ցամաքային պատերազմի ռիսկերը մեծանում են. The Economist

The Economist պարբերականը գնահատել է Իրանում հնարավոր ցամաքային ռազմական գործողությունների ռիսկերը՝ ուշադրություն հրավիրելով նման սցենարների պատմական փորձին։ Ըստ հրապարակման՝ Ասիայում իրականացված ցամաքային պատերազմները ԱՄՆ-ի համար հաճախ վերածվել են երկարատև և բարդ հակամարտությունների, ինչպես դա եղել է Վիետնամում, Իրաքում և Աֆղանստանում։ 

Պարբերականը նշում է, որ ներկայիս իրավիճակը հակասական բնույթ ունի․ մի կողմից ԱՄՆ նախագահ Դոնալդ Թրամփը խոսում է ռազմական գործողությունների ավարտի մասին, մյուս կողմից չի բացառվում Իրանի դեմ հնարավոր ցամաքային ներխուժումը։ Նշվում է, որ տարածաշրջան են ուղարկվել հազարավոր զինծառայողներ, իսկ որպես հնարավոր թիրախ դիտարկվել է նաև Խարգ կղզին։

Վերլուծության համաձայն՝ Խարգ կղզին կարևոր ռազմավարական նշանակություն ունի, քանի որ դրա միջոցով իրականացվում է Իրանի նավթի արտահանման շուրջ 90 տոկոսը։ Պատմականորեն այդ օբյեկտը դիտարկվել է որպես հնարավոր թիրախ տարբեր ժամանակաշրջաններում, իսկ որոշ դեպքերում ենթարկվել է հարվածների։

The Economist-ը նաև նշում է, որ կղզու վերահսկողությունը կարող է զգալիորեն սահմանափակել Իրանի նավթային արտահանումը, որը ներկայում կազմում է օրական մոտ 2,4–2,8 միլիոն բարել։ Միևնույն ժամանակ, հրապարակման մեջ ընդգծվում է, որ Իրանը ներկայում այդ արտահանումից ստանում է զգալի եկամուտներ՝ հակառակ նախնական կանխատեսումների։